زجل- صَيفِيِة شو ما أحماها

نِحنا في شَهـِـر تَمّـوز _____ فِيّو التّينِ وقَطفِ الكوز
وِالحَمِّ أعلى ما يكـون _____ بقَعدِة شَمِستُه ما يْجوز
______________________________    
وِالشَّمسِ خِطرِة بهالأيّام ____ لا تِسبح ساعاتِ الظُّهرِ
بِــالفَــيِّـه خَــيِّـم  ونـام  _____وِارتاح لِوقتِ العــصرِ
اسمع موسيقى وأنغام  _____ رَيِّح فِكرَك منِ السَّهَرِ
أُرسُم في عقلَك أحلام _____ الراحـة رايِح  بِتحـوز
______________________________  
جِسمَك ما بيِحمل أتعاب ____   وضُغوطاتٍ  نفسِيِّـة
أرمِ هَمَّـك وَرا  البـاب _____  رَيِّح عقلَـك  شـوَيِّــة
بِالرّاحة بتِبقى شبـاب _____   بتِلقى الصِّحَّة  القلبِيِّة
اتمَتَّع معِ الأصحـاب _____ بتِبقى شَب ومِش عَجوز
______________________________    
بجَوِّ الطَّبيعه بتِرتاح _____ بِالطّــاقَــة الإيـجـابِيّـِـة
مَع نَسمِتها بِالصَّباح _____تخَـلّي خـدودَك  وَردِيِّـة
يا قــديـر ويا فَـتّاح  _____اجـعـل  أيامـنـا  هَـنِـِيِّـة
خَلّينا مع بَعض ملاح ____ فيها الصِّحَّة راح مِنْفوز