تجوزت بعمر 16 سنة.. ماذا انجزت؟
وصلت الى موقع العرب رسالة من سيدة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية..
مرحبا للجميع...انا "امراة" من هالبلاد عمري 18 سنة تزوجت وعمري 16 سنة من جارنا 25 سنة-كنت معجبة فيو مش اكتر- واطلعت من المدرسة من صف تاسع (يعني اول ما خطبت)، وكنت مكيفة عالبدلة والحفلة والطلعات والنزلات وكمان الكل حولي كان فرحان اللي وولا حدا نصحني غير معلمة الي مكنتش احبها ومسمعتش منها. قلت لامي قام قلتلي \"المرة ملهاش غير بيتها وجوزها\" بس قلتلي انو الي حرية الاختيار (وانا بعمر 15 سنة الي حرية الاختيار بهيك قرار مصيري) واتجوزت بعمر 16 سنة هلئ انا عندي ولد وحامل بالتاني وانا بس 18 سنة بطلع عحالي ايش انجزت بحياتي ؟ ولا اشي صرلي سنتين بشطف بكنس بنضف غباير بنشر وبطوي وكمان وكمان وكمان، بروح يوم الجمعة عند مرت عمي ويوم الاحد عند امي وهيك كل يوم كل شهر كل سنة.. اختي اللي كنت اتمسخر عليها هيها خلصت التانوية وخطبت قبل شهرين عواحد متعلم وبدو يعلمها كمان الها...انا كتير فرحانة لألها بس خطبتها صحصحتني على كتير اشياء... وعرفت اني استعجلت بقراري وصرلي شهرين مش رايحة عند بيت اهلي عشان مش قادرة اطلع بوجه امي عشان الحقد مليان بقلبي منها اخر مرة كنت عندها وشكيتلها قالتلي انتي اللي اخترتي ومش انا.. وجوزي اللي مش فاهمة عقليتو بالمرة وحتى ابني الناس بتفكرو اخوي وحتى مش عارفة اربيه ... بطلع على حياتي معملتش اشي رح اموت وانا بنفس الحالة ..ضاقت فيي الدنيا ورحت عند معلمتي اللي نصحتني اول ما قلتلها قعدت تضحك وتقلي انا نصحتك وعملت اللي علي ... صرلي شهرين مش على طبيعتي بضلني سرحانة جوزي بقلي اني اخر فترة متلي متل الكرسي .. وابني بناديني بسمعوش وحماتي شغلتها انو تخلي حياتي جحيم وامي حتى بطلت تسأل واختي مشغولة هلء..وفش الي صحبات (مين وين بدي اشوفهوم؟) والمشكلة اني بشوف البنات بكررو نفس غلطتي بدي اقولكوم اطلعو لبعيد ومتنغروش بهبل الخطبة والحفلة يا ريت تسمعو مني وتتعلمو من قصتي ...
موقع "العرب" يوجه عناية الزوار الى انه بامكانهم ارسال مشاكلهم وتساؤلاتهم الى الموقع لاخد رأي الزوار فيها على alarab@alarab.co.il