فتاة :حياتي أصبحت جحيما فزوجة أبي تسيطر عليه وأوامرها القاسية لا تنتهي

- أبرز ما جاء في الرسالة:

* مشكلتي بدت لما امي توفت قبل سنتين

* عندي اخ بكل اشي بتدخل وكل اشي ممنوع نعملو حتى نفتح شباك غرفتنا

* اتعبت حاسة حالي فقدت كل حياتي ومستقبلي ولولا انو الانتحار حرام كان زمان انتحرت

* نفسي اعيش وانبسط زي كل البنات اكون حرة وانجح بدراستي وادرس الموضوع الي بحبه

وصلت الى موقع العرب رسالة من فتاة تيطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

حياتي جحيم انا صبية عمري 18 سنة مشكلتي بدت لما امي توفت قبل سنتين وابي اتجوز خالتي بعدها بفترة ومن يوميها والحياة اتغيرت من جميعو خالتي انسانة ما في بقلبها رحمة وابي بيطيعها بكل اشي هي بدها اياه، صارت تتحكم فينا وكل يوم والتاني تصير عنا مشكلة وكل العالم تعرف بيها.

صورة توضيحية

والمشكلة الاكبر انو عندي اخ بكل اشي بتدخل وكل اشي ممنوع نعملو حتى نفتح شباك غرفتنا ممنوع، ونطلع نقعد بالساحة ممنوع مع انو عنا الساحة مسكرة وابي ما بيقول لأ يعني دايما محبوسات بسببو، انا بطلت اركز بالمدرسة وكمان شوي عندي بجروت والاشي مصيري والله ازهقت حياتي. ما في حد فاهمني ما بكفي جرح امي وكمان زيادة عليه اوجاع ثانية، كل الناس بتعرف بمشاكلنا وانا بس بخفف عن حالي بالعياط .. اتعبت حاسة حالي فقدت كل حياتي ومستقبلي ولولا انو الانتحار حرام كان زمان انتحرت .. نفسي اعيش وانبسط زي كل البنات اكون حرة وانجح بدراستي وادرس الموضوع الي بحبه او على الاقل اعيش بين ناس بيحبوني واكون مستقرة بس للأسف حتى الاحلام مش عارفة احلمها.... بتمنى انكم تساعدوني وما تبخلو عليّ وشكرا الكم.

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il