شاب (24 عاماً): إفترقنا بعد 3 سنوات من الصداقة والحب ولا أستطيع نسيانها

أبرز ما جاء في الرسالة: 

تعرفت على بنت قبل 3 سنين وكانت علاقة صداقة مش اكثر اخر 6 أشهر حسيت حالي بلشت أتعلق فيها بما انها موجودة بمكان شغلي وبشوفها يوميا ضليت فترى افكر واقتعت انها مناسبة الي 

وافقت اروح اخطبها وفعلا رحت بس بعد فترة بلشت تتغير صارت تسمع حكي من ناس وبدون ما تحكيلي اشي وصارت تبعد عني بالايام وما تعاملني على اني حبيب وغير هيك طلبت تأجيل الخطبة لحتى تخلص تعليمها

ما قدرت اتحمل برودها وحكيت معها كلام جرحها بجد وهي طلبت نبعد عن بعض نهائي ولا اصدقاء حتى انا اعترفت بغلطي وندمان كثير وإعتذرت منها بس ما قبلت إعتذاري انا بعدني بعشقها مش متصور انها تكون مجروحة بسببي

وصلت الى موقع العرب رسالة من شاب يطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

مرحبا للجميع انا شب عمري 24 سنة تعرفت على بنت قبل 3 سنين وكانت علاقة صداقة مش اكثر، اخر 6 أشهر حسيت حالي بلشت أتعلق فيها بما انها موجودة بمكان شغلي وبشوفها يوميا ضليت فترى افكر واقتعت انها مناسبة الي ولاني ما بحب اعمل اشي يغضب ربنا فانا رحت وحكتيلها الي بقلبي وهي إعترفت بحبها الي كمان ووافقت اروح اخطبها وفعلا رحت بس بعد فترة بلشت تتغير صارت تسمع حكي من ناس وبدون ما تحكيلي اشي وصارت تبعد عني بالايام وما تعاملني على اني حبيب وغير هيك طلبت تأجيل الخطبة لحتى تخلص تعليمها،، طب ليش ثقتها هيك معدومة من الناس والله انا غير عن الكل معزتها عندي حجم الدنيا كلها ومع اني مستعد أقدملها عيوني على صحن من ذهب بس ما قدرت اتحمل برودها وحكيت معها كلام جرحها بجد وهي طلبت نبعد عن بعض نهائي ولا اصدقاء حتى انا اعترفت بغلطي وندمان كثير وإعتذرت منها بس ما قبلت إعتذاري انا بعدني بعشقها مش متصور انها تكون مجروحة بسببي.

صورة توضيحية 

انا الي وعدت نفسي اسعدها طول حياتها ومش عارف كيف اصالحها مش راضية تقرب علي او تحكي معي وحتى حكيت مع امها وكمان ما قدرت تساعدني طب شو اعمل يا ربي والله ضميري بعذبني كيف بدي أوصلها حتى لو بدها تنسى موضوع الخطبة او الحب او حتى الصداقة كل الي بدي اياه انها تسامحني ع كلامي وانا على استعداد لكل شي بس تنسى، تسامحني انا حتى بأحلامي بشوفها بتعاتبني والله كرهت كل شي بسبب زعلها مني بس والله كانت عندي ظروف عائلية شوي صعبة وكنت بحالة مش منيحة يا ريت أقدر أفهمها كل شي حتى ع الفيسبوك عملتلي بلوك مع اني عملت 4 مشان اعرف أخبارها بس ما قدرت اتحمل صرت اوديلها رسائل وهي تعمل بلوك الله بس بعلم كيف وضعي بسببها بس يمكن تسرعت لما حبيتها وتعلقت فيها عموما يا ريت تلاقولي طريقة أقدر أرضيها فيها.

 يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي:alarab@alarab.net