"صَباح عِزّ ومَجْد" - تميم الأَسدي

إلى روح الفنَّانة الكبيرة صباح التي رحلت عَنَّا جسدًا وستبقى روحًا تبعث
بصوتها عشق الحياة.
تِبْكي عَلِيكي دموع قَلْبي يا صَباح وتِبْكي دموع الشَّمْس بِطْلُوع الصَّباح
وتِبْكي نـِجُوم اللِّيل ودمُوع القَمَر يا راحِة الأَرْواح مِن هَمّ الْجِراح
يا سَحْبِة الآوف بْمواويل السَّمَر صَوْتِك سياحِة لِيل ساحِب لِيل ساح
من صَوت شَحْرور الزَّجَل يَلْلي غَمَر بالـمُرْتَجَل دَوْح القوافي بِالصُّداح
من خابْيِه فيها جَبَل عالي إخْتَمَر خَمْرِك شَرَح صَنِّين راح وإِنْشِراح
فَنّ العَتابا آوف يابا ما جَهَر من زَيّ صوتِك صَوت بالإِفْصاح صاح
عَبَّى جْرار عْيون وِعْيون النَّظَر سَرْحَت مع مْوَشَّح نَسَج رَفِّه وِشاح
صَبُّوحَه يا قَفْزِة غَزالِه بالسَّحَر غَزْلِة هَوا ساحِر هَوى يْغازِل أَقاح
لِبْنان أَرْز الرَّبّ بشْمُوخُو إفْتَخَر فيكي يا أَرْزِة مَجْد مِتْحَدِّي الرِّياح
يا عِزّ قُدْرَه بْهَيْبِه ما هابَت قَدَر والقُدْرِه عا قَدْر الثِّقَه تْوَثِّق نَجاح
لِبْنان مع إِسْمِك سَما لَمَّا صَدَر النِّيل نال بمورِدِك روح ومَراح
كُلّ قَلِب رَفرَف عِشْق بالعِشْق إِنْأَسَر أَسْر القَلِب بالعِشْق حُرِّيِة مِلاح
طَيْفِك شَذى أَلْطاف من زَهْرِك نَشَر دَبْكِة جَبَل لِبْنان مع رَقْص السَّماح
الشِّعْر من الفْغالي في عَصْرو شَعَر من خَمْر عَصْرو وعَنِّة الآهات زاح
غَنِّيتي شِعْر الشِّعْر بِكْر الـمُبْتَكَر ومِشّ شِعْر مَعْجوق بْشِعارات الصِّياح
شَحْرورَه كُنْتي طايْرِه بْرِحْلِة سَفَر وإلاَّ تْظَلِّي طايْرِه رَغْم الرَّواح
إلاَّ تْظَلِّي العِزّ في مَجْد الكِبَر كُلْما اللِّيل يْنام نِجْمو نُذْكُرِك
وكُلْما الصَّباح تْفِيق شَمْسُو يا صَباح