الأخبار العاجلة
الزواج والسلام في ظل الكورونا- بقلم: سهام فاهوم غنيم
كثرت النقاشات والجدالات والبلبلات في المدة الأخيرة حول الكورونا ولم تتضح الصورة الى الان.
لن نخوض في تفسيرات وتعليلات ونظريات المؤامرات, ولكن نجزم جزما قاطعا ان هناك الكثير من التناقضات والسياسات الغير مفهومة تجاه الموضوع. الصورة القلمية التالية تصف لنا التخبط في هذه الأوضاع.
يا ابو الخيرْ وينْتا بدْنا نْجَوز هَالصَّبي وْنِفْرَحْ
يا امِ الخيرْ طَوْلي روحكْ شويْ بسْ الكورونا ترَوَّحْ
وْأجا العيدْ وْراحْ العيدْ
وْما اتْجوزْ لا خيرْ ولا يَزيدْ
وْكُلِ الْعِيَلْ وِالْعَرايِسْ وِالْعُرْسانْ
كُلُّه ما حَدا منْهُم فَهْمانْ
ساعَة حَظِرْ نَهاري وْساعة حَظِرْ لَيْلي
وْساعةْ أِجَتْ الكورونا يا وَيْلي
ساعة السَّفرْ لِلْنُزْهة في الْبِلاد مَمْنوعْ
بَسْ المَطارْ فاتحْ وْلَلْيونانْ مَسموحْ ومسْموعْ
والمَدارسْ سَكَّروها وْلَشوا العِلمْ يا اخوانْ؟
الأجيالْ ضايْعة هيكْ هيكْ وْما حدا عِنْدو فَرْقان
بْنِرْجَع مَرْجوعْنا لَأْم وْأبو الخيرْ وْقَرَّروا عُرْسِ الأَلْفِيِّة
وْقَرَّروا يِطْبَعوا المَكْتوبْ وِيْوَزْعوا مِنُّه مِيِّه في مِيِّه
وْأِمْ الخيرْ سَألَتْ أبو الخير بتْفَكِّرْ انُّو راحْ يحْضَروا المَعازيمْ
يِمْكِنْ ,َبَفَكِّرْ اللي مِشْ راحْ تيجي أُخْتَكْ ريمْ
كيفْ يَعْني وِالنْقوطْ اللي دَفَعْناه لَلناسْ راحْ يْروحْ عَلينا
يا خسارة نَقَّطْنا بالأُلوفْ
وْشو راحْ نِسْتَدْ حَقْ خَروفْ؟
يَعْني شو فكْرك يا ام الخير نعْملْ ونقررْ
انا فكْري نكْتبْ عالْمكْتوبْ اللي ما بَدّو يِحْضَرْ
يْحَوِّلْ النْقوطْ لَحْسابي
وْليشْ مِشْ على حْسابي يا حبابي؟
لأَنَّكْ راحْ تاخُذْ نْقوطاتْ القاعة
وْأَنا شو بِدِّي آخذْ هَديك السَّاعة؟
وِاخْتلَفْ الأِثنانْ وْقام الصْياحْ
وْضَلُّوا يِتْجادَلوا حتى الصَباحْ
وْسِمْعوا تاني يومْ بِالأَخبارْ
انُّو الكورونا عَمْ بِتْفوتْ على كلْ دارْ
والْكلْ خايفْ والْكلْ مِحْتارْ
وْبالرَغِمْ من هيك
عِمْلوا عُرُسِ العريسْ خِيرْ البيكْ
وْبَدَلْ البقلاوة وَزَّعوا كَماماتْ
وْبدلْ علبْ العُرُسْ علبْ كحولياتْ
وِفجأة وِصْلِتْ الاخْبارْ والْكُلْ رَفَعْ الحاجِبْ
انُّه كانْ في العُرْسْ مَريضْ بيْأَدي الواجِبْ
وِالْكُلْ لازمْ يُدْخُلْ حَجِرْ صِحِّي يا حَبايِبْ
طَيِّبْ شو صارْ بالْعَريسْ وِالْعَروسْ هَلئيتْ
العَروسْ كورَنَتْ وْضَلَّتْ لَحالْها بِالْبيتْ
وَالْعَريسْ عِنْدْ إِمُّه واقفْ بْيِبْكي عِنْدِ الْحيطْ
وْأِمُّه تِنْدِبْ حَظَّاتُه
وِتْوَلْوِلْ وِتْقولْ مِشْ أَحسنْ لوْ القِطارْ فاتُه
يا جماعة لَشو نتْحدّا وِنْخالِفْ التَعْليماتْ
وْنِعْمَلْ أبو علي وْما نِسْمَعْ التَوْجيهاتْ؟
مزْبوطْ في وَباءْ بَسْ كَمانْ في وَباءْ سِياسي
للأَولْ مُمْكنْ يْلاقوا تَطْعيمْ أَساسي
بَسْ للثاني لا لأَنو هو صراعْ كَراسي
لأَنُّو الكورونا ناسْ عايْشِه على جَحيمْها
وْناسْ يا عيني على نَعيمْها
وِالْكُلْ ماشي مِثِلْ قَطيعِ الغَنَم مِشْ مِسْتَرْجي ييِفْتَح تُمُّه
واللي بْيِحْكي اكيدْ راحْ يْنَسُّوا حَليبْ أِمُّه
وْشو الحَلْ يا أَخَواتْ وْيا أِخْوانْ
في مِتِلْ هذا الوَضِعْ وْهذا الزَمانْ
الحَلْ إلْغُوا المُحاكَماتْ بْيِصْغَرْ مَقاسْ الكَمَّاماتْ!
الظَّاهِرْ انُّو الوَضعْ مِشْ مَعْقولْ والدولِه ما فيها مَسْؤولْ
وْكُلْ واحِدْ زُنَّاره مَحْلولْ
والزهايمَر السِّياسي عَمْ يِنْخَرْ فينا نَخِرْ
وْبَطَّلْنا نِعْرَفْ المَساءْ من الفَجِرْ
بَسْ يِمْكِنْ كَمانْ شْويْ يْنَسُّونا الكورونا
بْسَفرات الخَليجْ وْدبي وْهناك نْغَنِّي الدَّلْعونا
وْهلشَبابْ تِحْلَمْ تِرْجَع بْشنتاتْ الدولاراتْ
وْهَالصَّبايا حاجْزاتْ للشُغلْ في الاوتيلاتْ
وْبدْهِنْ يِرْجَعِنْ حامْلاتْ كْياسْ الماركاتْ
وْشو بَدْنا احْسَنْ منْ هيكْ يا عالمْ؟
إسرائيل صارتْ أكْبَرْ بَنْكْ في العالمْ
شِكْلوا ما حَدا فاهمْ اشي منْ اشي
يا عزيزي القارئْ وَكِّلْها لَرَبَّكْ وْاِمْشي
وْعلى فكرَة اذا انعَزَمْتوا على أَفراح دارْ أبو الخيرْ وما حضرْتوها
مِنْ فَضٍلْكوا حَوْلوا النْقوطْ على حسابْ رقم 000 وْايدْكُمْ بَحِبْحُوها!!!
موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.com
تابع كل العرب وإبق على حتلنة من كل جديد: مجموعة تلجرام >> t.me/alarabemergency للإنضمام الى مجموعة الأخبار عبر واتساب >> bit.ly/3AG8ibK تابع كل العرب عبر انستجرام >> t.me/alarabemergency