زجل قِلَّة الوَعي والأفكارِ الهدّامِه – بقلم أسماء طنوس المكر 

___________________________________  
لَمّـا وَعْـيَك مِـش كـافي  ---- يِبقى نَقصُه ما يْوَعّيك  
كـلامَــك ما هـو شـافي ---- لا تْـقـولُه أللـه يخَـلّـيك 
____________________________  
كلامَـك ما إلو لْــزوم  ---- لا بيـأخِّـر ولا بيــزيــد 
مالُه مَعنى ولا مفهوم---- عَالفاضي بتِحكي وبِتْعيد 
تِبقى بكلامَك مهزوم ---- مِش صـالـح ولا مُـفـيـد 
كُلُّه وَقتي وما بيدوم ---- أُطلُب مِن ربَّك يِـهـديـك  
____________________________  
لا تْخَــلِّ فِكـرَك هَـدّام ---- راح يِتزَعـزَع مَكـانَك 
مـا بِتـفَــكِّــر لَــقُــدّام ---- فِــكـرَك كُـلُّه عَـشـانَـك 
ما بتِمشي خُطوِه لْأمام---- فِـكـرَك قـاتل زَمـانَـك 
لَوْ كان في قَلبَك سلام ---- سلامَـك رايِح يِبْـنيـك