زجل -نحنا في المستقرضات    بقلم: اسماء طنوس المكر

                         زجل            نحنا في المستقرضات    بقلم: اسماء طنوس المكر
                         شهر شباط مانَّك قليل _____  بتعـمل المُفاجئات
                         فيك عمِلــت الهـوايِل _____ بأيام المستقرضات
                         _____________________________
                        شهر صغير وفِعلُه كبير_____ وِتْـحدَّيْت الكوانـين
                        بالبردِ  ومطرَك الِكثير _____ إبن عمَّك كان مُعين
                        مرَّه بتصـحا عَالبكّيـر  _____ ومرَّه بتغمِّض العين
                        مشَوَّش دايماً بالتفكير _____  مشهـور بالتّقــلُّبـات
                       _______________________________
                        سَعد بلع كان فرحان  ______ فَرَّح شـجر وِبْساتيـن
                       أرضُه العطشانِه كمان ______ وَدَّتلُه الشُّــكر ملاييـن
                       بيقولوا مـالَـك أمـان   ______ إن خَــيَّبـت الفلاحيــن
                       طلِعِت شاطر وفهمان  ______ وما هَمَّـك التّأويــلات
                       ________________________________
                      لولا  بِـن عـمَّــك آذار  ______ ما كـان لَـك أيَّ تَقـديــر
                      أكـرَم عليـك بأمطـار  ______  خاف عليـك منِ التَّعيير
                      بهِــمِّــة آذار الهـدّار  _______ صِرِت بطل يا الِصغيـر
                      لا تنساه مهمـا صار  _______  بيـبقى فضــلُه للمَــمات