زجليتان - بقلم: عصام ميعاري
رسمتك درب فيها بسافر
رسمتك درب فيها بسافر
على دفتر حياتي العاطفية كتبتك بالحروف الأبجدية
صورة مع إسم جوا الخواطر لأني شُفتك بقلبي وعينية
انا عاشق قبل ما كون شاعر تعي وشوفي أحاسيسي الغنية
من الأول شُفيها ومن الآخِر ساعتها بْتفهمي بْسرعه عليه
ولأني بملك بْصَدري المشاعر وعشقي فاق روح الشاعريّة
رسمتك درب فيها بسافر بشرط يكونوا إيديكي بْإيدية
نبال البُعُد مع ضرب الخناجر ما قِدروا يُقُتلوا الآمال فيه
انا تحديت شعار المنابر بِحُسنك وبْجمالك يا عشيقة
أنك أحلى من أحلى صبية
عبير الورد مع شهد الخلايا
رماني الحب عا قلبك رماني بْسِهَامو الجارحة هزهز كياني
نُهور الهوى فاضت بالحنايا وطوفان العشق طفَّالي نيراني
انا المغروم وبصدق النوايا فؤادي خافق وخفقه كواني
واذا اعطوني على تركك سرايا لا يمكن إني أنساكي ثواني
عبير الورد مع شهد الخلايا انتِ يا شذى عمري وزماني
صورة خلقك بأجمل مزايا وعيونك فيها من أسمى المعاني
الــه الكون بتوزيع الهدايا لأجل الحب إياكي هداني
من اللازم بلا أي وصايا وتا يبقى حبك بقلبي طريقو
أصونك بالمحبة والتفاني
