زوجي اتهمني بالتحرش بشقيقه وحرمني من ابني ويطلب الان السماح! هل ارجع؟

ابرز ما جاء في الرسالة:

كنت متزوجة لأبن عمي..ولشدة غيرة امه وأخته تطلقت وعمر ابني البكر 6 اشهر 

حرمت من ابني وحياتي الزوجية لان امه وأخته اتهموني بعرضي وشرفي وبأني اتحرش بأخيه الصغير

بعد طلاق ثلاث شهور وعدم رؤيتي لابني انهارت اعصابي...وبدأ يتحجج بأني ليراني والان يطلب مني ان اعود زوجة له 

 وصلت الى موقع العرب رسالة من سيدة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة كالتالي:
أنا امراة عمري 22 سنة خلصت لقب اول حقوق واسا بدي أبلش أحضر للقلب الثاني مشكلتي انه أنا كنت متزوجة من ابن عمي اللزم و هو أكبر مني بثلاث سنين يعني هو عمره اسا 25 والي منه ولد صغير عمره سنة و نص... انا تزوجته عن حب كبير رغم معارضة امه لانه كانت بدها تزوجوا لبنت اختها و من اول اسبوع زواج بلشت المشاكل من ورا امه... احنا كنا متفقين من الاول انه انا اكمل تعليمي لانه انا دائما كنت متفوقة بالمدرسة و هو وافق على هادا الاشي.... المهم امه و اخته كمان ضلوا وراي لحد ما اتطلقت و كان ابنه لساته عمره 6 شهور... حطوا بشرفي و بسمعتي و اتهموني انه كنت بحاول اتحركش باخوه الصغير يلي هو من جيلي... بس اقسم بالله العلي العظيم انه بريئة و شريفة و بعمري ما اطلعت بحدا غير زوجي نظرة غير بريئة... المشكلة انه زوجي صدقهم و طلقني و اخذ مني الولد و صارت القصة كبيرة... مرت علي ايام و الله العظيم اني ما كنت انام فيها و انا افكر بابني الصغير... كنت بس ليل نهار ابكي...

صورة توضيحية

 ترجيته يخليني اشوفه بس ما كان يرضى... من ثلاث شهور اجا زوجي لعنا على البيت و كان معه الولد لما شفت ابني بعد حوالي 9 شهور انهرت و صار عندي انهيار عصبيز... المهم زوجي اعتذر مني قدام قاريبينا و خلى الولد معي و اسا ابني معي و رجعلي كل الذهب يلي كان معي و دفعلي المؤخر يلي كان متفقين عليه بالعقد و صار يعطيني مصروف للولد رغم انه انا اول اشي رفضت علشان ما كنت بدي منو اشي بس هو قلي انا بدي اصرف على ابني... صار كل يوم بعد ما يحل من الشغل المسا يجي لعنا على البيت و يشوف الولد و يلعبه شوي و كل يوم بيجبلوا غراض... خوالي و عمامي و خالاتي و عماتي بيقولولي ارجعلوا و اسامحه علشان هو بدو ياني... انا الصراحة كتير محتارة و مش عارفة شو بدي اعمل... انا مش قادرة انسى كيف انه هو شك فيي و طلقني و حرمني من ابني و انا مظلومة... هو كان دايما كتير منيح معي سمحلي اكمل تعليمي و كتير كريم معي و حنون و مش حارمني من اشي ... اسا هو ما بيحكي مع اهله حتى انه يعني عمر هيك حيط بينه و بين بيت اهله و فصلوا تماما عنهم... و الله العظيم محتارة كتير و مش عم بعرف اعمل اشي بحياتي، ارجوكوا ساعدوني و قولولي شو اعمل، ارجعله و انسى كل اشي صار و لا خلص اكمل تعليمي و اشتغل و اعيش لحالي و لابني.... شكرا كتير لالكو علشان اتاحتولي الفرصة اعرض مشكلتي؟؟؟
 
يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il