شابة مسلمة: احب شاباً مسيحياً واعلم ان هذا غير جائز شرعا واتمنى ان يوفقنا الله

السلام عليكم ورحمته الله و بركاته، انا عندي مشكلة و حبيت اقولها و بطلب مساعدة انا فتاة مسلمة والحمدلله و بعرف انه حسب الشريعة الاسلامية الزواج من غير المسلم غير جائز شرعا. وانا بحب شخص و هو مسيحي الدين و بما اني انسانة مؤمنة بالله وبرب العالمين لا اؤمن بالزواج المدني لانه ليس ببركة من الله عز وجل.


صورة توضيحية 
 
انا بعرف انه بحبي للمسيحي عم اتحدى مجتمع و اهلي و كثير اشياء مشكلتي هي انه بعد كثير نقاشات بيني و بين الشخص الي بحبوا توصلنا انه نتزوج و كل واحد يبقى على دينه انا بعرف انه اهلي راح يرفضوا الفكرة بس انا بحب اهلي و بحب ديني و غيورة على ديني بس بنفس الوقت انا بحب الشخص المسيحي هذا ..احنا شعب واحد وعايشين مع بعض وتجمعنا حضارة و ثقافة و لغة واحدة واسا انا حابة اسأل سؤال يمكن رجل ديني مسيحي يجاوبني عليه : هل مسموح ان المسيحي يتزوج من غير المسيحية بالكنيسة؟

عم امشي بعكس ديني
انا بوجه سؤالي من منبركم الحر وحابة اسمع جواب يمكن انا عم امشي بعكس ديني وبعكس مجتمعي بس انا بعرف انه الجازة مش لعبة ولاد الجازة مسؤولية و انا بتمنى انه فعلا ارتبط بهذاالشخص لاني بشوفه نصي الثاني و متفقين على كل شي انا بقول انشالله الله يوفقنا يمكن البعض يقولي لي ما بتخلي الشب يعتنق الاسلام بس انا بعرف شي واحد انه الاقتناع بالاسلام بده يكون كامل حتى يدخله و ما يدخله كرمال الارتباط فيني.

أتمنى ما يكون فتعقيباتكو نوع من العنصرية والتحيز لدين معين، يجب ان نبقى اخوة متسامحين متحابين، ورجاء خاص ما حد يتدخل بدين ثاني، واللي بشوف تعقيب ما بعجبو ولا كأنه قراه ...