عمرو السعودي ينثر حروفه على العرب:كناكنا وصلنا لفين ؟
ما تعاتبونيش
ما تعاتبونيش
بان القصه معدتش محبوكه
وفــ نصها باسرح وابطل حكي
انا مش نتاج للحرب او للسلام
انا نتاج للكلام
انا جزء مـــ القصه القديمه
وما اكتملش
انا آخر هتاف في الميدان
ما تقلش
ما تحاسبونيش
ان البطل في القصه
كان مسطول
ولا عشان الخيول
مستورده من الصين
ولان قيمه الطين
بقت في احتمال الجاز
انا كنت منحاز
في الحكايه للحياه
ولانتصار الخير علي الشر
من كتر ما قال البطل مضطر
وأقر بالتوهه ساعه اتخاذ القرار
خلاني اسرح معاه
في فايده الاختيار
مابين الفيس بوك
وبين المدونات
الوحي بيتكلم لغات
وعنده حساب في البنك
وما عدش غاوي الادب
هرب لسويسرا
وبعتلي ايميل
طلب مني اشيل اسمه
من القايمه
واقطع علاقته بكل ابطالي
ونصحني
اقول الصبح وانا مالي
الشمس
مش وش انسان بيضحك
لكني ياما رسمتها
مدوره
وشعاعها كان خط مستقيم
وفي اليوتوب شفتها كأنها بركان
والقمر مش رمز للهيمان
القمر حزنان في صورته عالجوجل
ويكلكس كانت حاجه
مش مفهومه
بس البطل ما اندهش
ولا حس انه اتغش
وبعدين فيلم الفين واتناشر
بيقول ان التلج هش
وان الخريطه هتبقي مختلفه
والعالم هيغرق
وان عم سام هيسرق
البواقي
ويهاجر المريخ
بعد ما يرمي علينا
صندوقين صواريخ
وبعدين
**
بعد ما فقد الذاكره
فجأه افتكر حاجتين
بان في الوطن
محتل
وبان في الثوره
حل
...............
و
.........
وبأن
....................
وبعدين
..................
كنا وصلنا لفين ؟
البرازيل
