فوزي ناصر يكتب على صفحات العرب:توتة الحارة
ريحة مطر والريح محتارة وكت الورق عن توتة الحارة
ريحة مطر والريح محتارة وكت الورق عن توتة الحارة
وستّي حلا
إل مالها حدا
لا ولد عندا ولا تلد
كانت غريبة بالبلد
بتصير في تشرين محتارة
وعيونها بالدّمع مطّاره
ستّي حلا
بتبكي على حالا
وينك يا ابني وين
يا عبد الصّمد؟
يالْ كان نوّاره
راح يا خسارة
خطفتوا الجنيّه عا عين البلد
بعرفها... وبعرف اسمها سارة
بتسكن بلمغارة،
فوق العين في مغارة
ويلي على عبد الصّمد
يالْ كان لإمّو سند
شافوه عا عين البلد
عَ باب لمغارة
وشافو معو سارة
راح الصّبي يا ناس
يا خسارة
ومن يوم ما راح الولد
هبّت بقلبي النار
هبّت علينا الريح
والغيم غطّى شمسنا
والشمس خفّت نْوارا
راح العقل منّي
وكت الورق عن توتة الحارة
وكل سنة
عَ الميعاد
في تشرين
بيكت الورق
عن توتة الحارة!!
(الناصرة)
موقع العرب يفسح المجال امام الكتاب لطرح أفكارهم التي كتبت بقلمهم المميز ويقدم للجميع مساحة حرا في التعبير عما في داخلهم ضمن زاوية رأي حر. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net
