يا أمي خبّيني.. بقلم :عُبور درويش

يا أمي خبّيني .. أنا بردان بعبايتك غطّيني يا ريت أنام وتغفى عيني خايف أغمض... خايف يمّا.. رصاصه تُخرق جبيني يا أمي رُدّي علي .. يامو.. بنادي.. بصرخ.. ما بتسمعيني.. أنا عطشان وحياتك أسقيني دموعي نشفت من عيني.. شو صار يا أمي.. ذكريني ليش عبايتك مبلله..؟؟ ليش نمتي وتركتيني..؟؟ يمّا شُفت دبابه.. شُفتها بعيني هدمت بيت جارنا .. وفجّرت دار عمتي أمينه يا يمّا طلبت منك تخبّيني .. عتمه وتراب ونار ودخّان.. وروايح..غريبه.. مش ريحتك يا أمي.. ريحتك بعرفها .. ريحتك متل الحبق والياسميني رُدّي علي.. أنا أبنك ما عرفتيني؟؟ يا يمّا اذا ضايقتك سامحيني أبوس أيدك تسامحيني يا امي أيدك بارده.. أصبعك.. أصبعك.. ممدود كأنو بدّك توبخيني يمّا دخيلك ..عاتبيني.. زعليني مش مُهم بس لا تتركيني أنا خايف.. بحُضنك حُطّيني.. داعبي شعري..لامسي خدّي.. غنّيلي... يا حنونه صوتك بهدّيني يا رب تطلع الشمس .. وتصحي يا أمي .. تفتحي عيونك وتلاقيني وتعرفي أني ناطرك تضُمّيني وتترضّي علي قبل ما أنزل وألعب مع صحابي بالجنينه