تزوجني على الورق لينقذني وينام بغرفة أخرى ولكنني اكتشفت بمدى عشقه لي

وصلت الى موقع العرب رسالة من سيدة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة هي التالية:
بصراحة مش عارفة انا ليش عم بكتب مشكلتي هون او ازا حتى راح يتغير شي لما اكتبها... المشكلة انو ما في حدا احكي معو واقوله قديش انا حزينة... فكرت بالانتحار كزا مرة بس دايما كنت بتراجع لاني كنت بخاف من الاخرة... انا انهيت للتو دراستي الجامعية وبأول شهر 9 راح أبلش شغل... مشكلتي هي انه انا متزوجة من قريب لالي من اربع سنين بس هو بس زواج صوري... انا ابوي توفى قبل ست سنين و تركنا انا و امي و اخواتي بنات تنتين لحالنا... اخواتي الشباب الثلاثة كانوا متزوجين لما ابوي توفى و هم كانوا يعطوا امي مصاري بس يعني لحتى نظلنا عايشين، المصاري ما كانت بتقدي لنهاية الشهر... حياتنا كانت عذاب كنا محرومين من كل شي خصوصا انو نحنا من قرية و ما في مجال للشغل فيها...


صورة توضيحية

مخلص لي حتى النهاية
اخواتي الشباب كانوا بدهن يزوجوني لواحد اكبر مني ب ١٥ سنة كرمال انه هم بيروحوا عنهن... بعدين زوجي اجاني زي هدية من السما، حكالي انه هو مستعد يتزوجني لحتى يساعدني اكمل تعليمي و اعمل مستقبل لالي، بس اخواتي ما رضيوا و اهله كمان ما رضيوا و خبروه انه راح يتبروا منو ازا بيظل مصر انه يتزوجني، بس و رغم انه اكبر مني بسنتين تزوجني غصبا عن الكل، يعني نحنا تزوجنا خطيفة، و طول فترة زواجنا هو بينام بغرفة و انا بغرفة و العلاقات مقطوعة مع اهلي و اهله، بصراحة هو شاب كتير ادمي و شغيل، رغم انه وضعه المادي يعني عادي بس مش مقصر معي بشي... اتفاقنا كان انه يظل معي لحد ما اخلص تعليمي و الاقي شغل و بعدين بنترك بعض... المشكلة انه انا و لا مرة سألت حالي ليش هو رضي يتزوجني زواج صوري... يمكن ظروفي الصعبة ما خلتني افكر بهيك شي، يمكن انا انانية و ما بفكر الا بحالي، صحيح انه انا كنت مش مقصرة معه بشي بالبيت بس مرات كتيرة بحس حالي انسانة انانية... من فترة فتشت بصندوق عند زوجي و شفت فيه مفكرة بيكتب فيها كل يوم شو بيصير معه خلال النهار... قرأتها و ساعتها عرفت ليش هو تزوجني...

اكتشفت انه يحبني من قبل الزواج
هو طلع بيحبني من زمان من قبل من نتزوج بكتير و انا ما كنت حاسة فيه ابدا... لما قرأت شو كان كاتب حسيت انه انا صغيرة كتير و انه ما بستاهل اعيش، حسيت انه انا ظلمته كتير معي، يمكن لو تزوج واحدة تانية كان عندو اولاد و كانت علاقته باهله منيحة، بس انا ما كنت بفكر الا بحالي و كيف اتخلص من حياة البؤس يلي كنت عايشيتها عند اخواتي... مش عارفة ايا شي خاصة انو انا بهالايام بحس انه زوجي بيظل سرحان و زي يلي مهموم، سألته ازا في عنده مشاكل بس حكالي لا عادي ما في شي، بس انا بعد ما قرأت شو كاتب بمفكرته بحس انه زعلان عشان انه زواجنا المفروض قري بخلص... مشكلتي انو انا من ورا اخواتي كرهت الدنيا و ما عاد في عندي ثقة بالرجال ابدا، انا يعني ما عندي مشاعر حب تجاهه بس انا بعزوا كتير و بقدره و بحترمه و تعودت عليه يكون دايما بجنبي... يا ترى هلئ انا شو لازم اعمل اصارحه انو انا عرفت انه هو بيحبني و بدو يكمل معي و اعيش معه و لا خلص نترك بعض زي ما كنا متفقين و اترك البلد يلي عايشة فيها و اشوف شغل بمطرح تاني و لا اخلص من حياتي كلها و اريح الناس مني، انا كتير تعبانة و مش عارفة شو لازم اعمل. أريد حلاً ..

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il