شابة: أنا وأخواتي نصرف على اخوينا الشباب التوأم المدللين

وصلت الى موقع العرب رسالة من شابة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

انا شابة في العشرينات من عمري، عندي 4 خوات غيري أكبر مني وعندي أخوين توأم وهني الصغار، يعني آخر العنقود .. مشكلتي بدأت عندما تخرجت من صف 12، وبدأت اشتغل على شان اوفر لأني بدي اتعلم وهيك.


صورة توضيحية

طبعاً احنا في العيلة تعودت انا وخواتي انه كل شي مسموح لأخوتنا الشباب عمرهن 20 والنا لأ ، والأصح انه نقول انه كل مصاري العيلة رايحة لأخوتنا الشباب، اختي الكبيرة الها أكثر من سنة بتشتغل على شان تتعلم بس مش زابطة معها لأنها بعدها ما وفرت كفاي، رغم انها كتير شاطرة، اخوتنا الشباب يوم بشتغلو وعشرى لأ، واهلي ما بحككو معهن، لأنهن المدللين في العيلة ومن جيل صغير .

الأخوات يصرفنّ على الأخوين
خواتي الاربعة علمو اخوتي الشباب سواقة على حسابهن مع انه خواتي ما تعلموا سواقة، واشترولهن سيارة وكل مصاريف السيارة على حساب خواتي مع انه لما تيجي وحدة منهن بدها تطلع على مشوار برفضوا يوصلوها، ولما تخرجوا من المدرسة راحو مع اصحابهن سافروا وكمان على حساب خواتي، ومش بس .. ابوي طالع بلنة جديدة بدو يعمر لإخوتي وطبعاً على حساب خواتي، خواتي بشتغلوا ليل نهار وبتعبوا تعب كبير على شان يجيبوا الشيكل وكل المصاري بتروح على اخوتي الشباب ويا ريتهن فالحين.

مصاريف زائدة
ما تستغربوا اني بحكي عن اخوتي هيك بس ما قد ما انا مقهورة على سنين شباب خواتي اللي راحت وهني يصرفوا على الفاضي على اخوتي الشباب، كل شهر خواتي بعطوهن حوالي 1500 زي ولا اشي وكل هاي المصاري بتروح على البنات والروحات والجايات والمشاوير والسهر !!

الأهل يقفون مع الشباب
مش عارفة شو اساوي وان حكينا بالخرافية ابوي بقول انه ما النا غيرهن وهني سندنا ومن هالحكي اللي بسكت الواحد بالغصب ! وانا ما بدي يصير فيي هيك، انا اللي كمان فترة بشتغل بس بحط مبلغ منيح للتوفير، بس برضو لما بطلبوا مني بعطيهن !!!!
شو أعمل؟ كيف اغير الوضع؟

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il